LEGAZPI CITY-–Nagtutubod an sarong propesor na magigin importante an nangyaring pagbabago sa liderato sa Senado sa dalagan kan impeachment trial ni Vice President Sara Duterte.
Segun ki UST-Political Science Professor Prof. Paul Micah Francisco, sa intrevista kan Bombo Radyo Legazpi, mahihiling sa nasabing lakdang kun pano ipepresentar an mga ebidensya, an pagdangog sa mag-inibong na kampo urog na sa prosecution asin defense.
Alagad ipigdoon man kan propesor na saro man giraray ining political process kaya depende man liwat sa numero kan mga maboto na pabor o dae pabor na ma-impeach an bise presidente; siring man na pwedesir na dakol an posible pang mangyari.
Dugang niya na posible man na makaapektar sa kredibilidad kan Senado an mga nangyari puon sa pagribay nin liderato magin an pagbalik asin pagdalagan ni Senator Bato dela Rosa sa Senado.
Mientrastanto, pighayag man kaini na mas makakamaray sa imahe kan Senado kun kun dagos nang isurender si Senator Bato dela Rosa sa mga otoridad mapadapit sa kasong pigkakahampang kaini sa International Criminal Court.
Segun saiya na dipisil na an magkaigwa nin tensyon asin dae ini makakamaray urog nang may pig-deploy nin mga militar asin may mga demonstrators sa Senado.
Mensahe man ni Francisco sa publiko na bilang namamanwaan na padagos na mag-antabay asin magin kritikal sa mga impormasyon sa presenteng sitwasyon kan pulitika sa nacion.
