LEGAZPI CITY – Sarong senior citizen na nagbabalyo sa pedestrian lane an na hit and run kan sarong motorsiklo sa Barangay Anislag, Daraga, Albay.
Segun ki Kapitan Jay-Ar Madrideo sa intrevista kan Bombo Radyo Legazpi na nangyari an insidente sa naunambitang barangay bandang alas singko nin maagahon.
Basado man sa saindang record, may edad 65 anyos na biktima asin residente kan parehong barangay mantang inabot nin sarong aldaw antes mai-blotter an nasabing insidente.
Pagdoon niya na nakuwaan nin cctv footage an pangyayari alagad bako klaradong nahiling an kulay asin klase kan motor pati man an plate number kaini.
Paglinaw pa kan opisyal na pighiling na man ninda an mga kuwa kan ibang cctv sa saindang barangay alagad nagtetenir na bako klarado an itsura kan nakabangga sa senior citizen huli sa suboot maagahon ini nangyari.
Base man sa saiyang pakikipag-olay sa pamilya kan biktima an napag-araman na nagsapo nin fracture an lola sa saiyang kamot na kawsa kan impact kan aksidente.
Makamundo suboot huli mas pinili kan rider na dulagan an saiyang nabangga imbes na tabangan ini.
Sa presente an pighayag ni Madrideo na padagos an pigsasagibo nindang tracing sa iba pang cctv footage nganing aramon kun residente kan saindang barangay an nakabangga sa lola mantang nakikipagkoordinar na man sinda sa Philippine National Police nganing maparikas an pagdakop sa driver kan nagdulag na motorsiklo.
