LEGAZPI CITY – Ikinaugma kan Philippine Statistics Authority (PSA) Bicol an impresibong turnout kan saindang isinagibo na one-day National ID Registration sa pakikipagtabangan kan Civil Registrar of Legazpi City.
Segun ki PSA Bicol Registration Officer III & National ID Focal Person Rudyard Ernest Sabao sa intrevista kan Bombo Radyo Legazpi na basado sa saindang inisyal na datus an uminabot sa labi 100 katawo an saindang nag-aprobitsar kan programa.
Kadaklan man sa nagparehistro sa aktibidad iyo an mga benipisyaryo kan Pantawid Pamilyang Pilipino Program na labing kaipuhan ninda sa paghahagad nin tabang asistensya sa Department of Social Welfare and Development.
Afuera suboot sa nasambitang aktibidad an nagpapasiring man sinda sa kada barangay kan nasambitang ciudad tuyong aldaw nin biyernes nganing mairani sa namamanwaan an National ID Registration.
Masasabi man kan opisyal na importante an pakikipagtabangan kan saindang ofisina sa mga lokal na gobierno nganing ma-enganyar an saindang nasasakupan na aprobitsaran an piglalansar nindang mga programa.
Pigdugang niya pa na nagpapadagos an saindang registration bako sana sa provincia kan Albay kundi pati man sa enterong parte kan rehiyon Bicol mantang nakikipagkoordinar man sinda sa mga eskwelahan para sa pagsasagibo nin mobile registration.
Pagirumdom man ni Sabao sa mga mawot magparehistro na kinakaipuhan magdara nin mga original na kopya kan saindang mga birthcertificate alagad ibabalik man sana suboot ini sa sainda huli ta pagbabasehan man sana ini kan saindang identidad.
 Bicol welcomed the impressive turnout of its one-day National ID Registration in collaboration with the Civil Registrar of Legazpi City.){kind=link}