LEGAZPI CITY — (Update) Piglalaoman na aabuton pa nin nagkapirang bulan an pagtetenir kan rinibong evacuees na apektado kan nag-aalburutong bulkang Mayon mantang wara man na nakakaaram kun nuarin matatapos an aktibidad kaini.
Katakod kaini, nagbilog nin estratehiya an Albay Public Safety and Emergency Management Office (APSEMO) sa pamamayo ni Dr. Cedric Daep tangarig ma-‘stretch out’ an mga nag-aabot na donasyon hasta sa pighahalat na pagbaba kan aktibidad asin pagpapabalik kan mga evacuees sa kani-kaniyang harong.
Segun ki Daep, bako sa kada alkalde o municipality an relief distribution kundi sa kada numero kan evacuees na igwa an lugar kaya’t imbes na equal distribution, equitable distribution suboot an ipigsasagibo.
Sa paglaog man kan tabang na hale sa mga national government agencies, pig-aaksyunan naman kan provincial government an nagkapirang lugar na dae marhay napapa-abotan kan tabang.
Dugang pa ni Daep na inabisuhan an nagkapirang donors sa iba pang pangangaipo kan mga evacuees siring man sa timing kan pag-abot kan donasyon tangarig na maibitaran an ‘donors fatigue.
Mientras tanto, liwat na inasegurar kan APSEMO an transparency asin accountability sa mga nag-aabot na donasyon kun saen aro-aldaw man suboot na ipigpo-post an update sa sa mga nareresibe sa luwas kan Provincial Social Welfare and Development Office.
