LEGAZPI CITY-Nakaabot na sa Agusan del Sur an nasa 90% na mga delegado gikan sa Bicol Region para sa pinag-aantisiparang Palarong Pambansa 2026.
Segun kay DepEd Bicol Regional Sports Coordinator Francisco Dexter Sison, sa intrevista kan Bombo Radyo Legazpi na nasa 99 packs pa an pighahalat na makaabot gikan sa Camarines Sur huli sa distansya kaini sa lugar.
Padagos man na pigkokonsidera an kaligtasan kan mga delegado, siring man an pagkakaigwa nin koordinasyon katuwang an DepEd Bicol asin gabos na LGUs.
Maserbi man an Bayugan Central Elementary School SPED Center bilang billeting area kan mga delegado.
Sinabi ni Sison na saro ining “collaborative effort” bako sana kan mga local government unit kundi kan bilog na Bicolandia.
Huli digdi, piglalaoman kan opisyal an tabang kan gabos bako sana sa pinansyal, kundi sa pagpangadyi ngani magin matrayumpo an mga delegado sa Palarong Pambansa ngonan na taon asin laoman na magkaigwa nin magayun na performance para sa gintong medalya.
