LEGAZPI CITY-Nag-ofresir an Department of Labor and Employement (DOLE) Bicol nin nasa 3,000 na mga bakanteng trabaho hale 13 Local Employers asin 5 Overseas Employers sa ciudad kan Legazpi.
Segun kay DOLE Bicol Technical Support and Services Division Chief Ching Banania, sa intrevista kan Bombo Radyo Legazpi na kasunod kan 92nd founding anniversary kan ahensya, nagkondusir sinda nin job fair kasabay an “Kadiwa ng Pangulo” Program.
Katuwang ninda an manlain-lain na ahensya kan gobierno siring kan Philhealth, Social Security System (SSS), Bureau of Internal Revenue (BIR) asin National Bureau of Investigation (NBI).
Obheto suboot kaini na tawanan nin trabaho an kada pamilyang pamilyang Pilipino.
Nagpapadagos suboot an job fair hasta sa igwang aplikante.
Sa mga mawot mag-apply, pigaabisuhan kan ahensya na magpasiring sana sa 3rd floor kan SM City Legazpi ngani makapagparehistro asin pwedisir sindang makapili para sa magigin employer.
Padagos man suboot an lakdang kan ahensya ngani makapagtao nin marangal na trabaho.
Liwat na magsasagibo an DOLE nin Job Fair sa maabot na Disyembre 11 kaiba an mga kadiwa exhibitors, mga partner government agencies, asin mga pribadong kompanya.
Mientrastanto, nasa 25 kadiwa exhibitors man an nakisumaro sa aktibidad kun sain pigpapabakal an mga lokal na produkto siring kan prutas, gulayon, bagas asin manlain-lain na livelihood products sa baratong kantidad.
