LEGAZPI CITY—Nagsakat sa pocomas o menos 1,000 registrants an nakisumaro sa ginibong job fair kan Department of Labor and Employment Bicol sa Legazpi City kan Labor Day, Mayo 1.
Segun ki Department of Labor and Employment Bicol Director Imelda Gatinao, sa intrevista kan Bombo Radyo Legazpi, basado sa saindang inisyal na datos nasa labi 100 na indibidwal an hired on the spot sa nasabing aktibidad.
Naglalaom an opisyal na an mga na-hire an dagos nang makakua nin trabaho.
Dugang niya na an nagkapirang kwalipikado an kinakaipuhan pa nin kadugangang interview sa senior manager kan mga nagpartisipar na establishimiento o ahensya.
Pighayag kan opisyal na nagin matrayumpo an isinagibong job fair sa ciudad huli sa mahihiling an kamawotan asin gabos nakikipagkoordinar sa proseso asin warang nagreklamo.
Mientrastanto, nagpapasalamat man si Gatinao sa gabos na ahensya, establishimiento, mga opisyal asin aplikante na nakisumaro sa naunambitang aktibidad.
