LEGAZPI CITY-Nagpatanid asin nag-alerto man an Department of Agriculture (DA) sa mga paraoma asin parasira sa posibleng huma kan bagyong Crising.
Basado sa ipinaluwas na advisory kan Philippine Atmospheric Geophysical and Astronomical Services (PAGASA), kabali sa posibleng maapektuhan kan bagyo an nagkapirang parte asin lugar sa Northern Luzon asin magin sa rehiyon kan Bicol.
Kasunod kan nasabing advisory, tulos man na nagpaluwas nin advisory an ahensya sa mga paraoma asin parasira na magpoon nang mag-ani kan saindang mga pananom asin gulay bago pa man sinda maging saro sa mga apektado kan pag-uran asin makusog na duros na dara kan Bagyong Crising.
Inabisuhan man kan opisina an mga paraoma na ibugtak an reserbang binhi, magin an planting materials, farm inputs asin magin an makinarya sa ligtas asin halangkaw na lugar ngani na dai madanyaran enkaso magin makusog an epekto kan bagyo.
Inabisuhan man kan ahensiya an mga lokal na gobierno na linigon an mga agihan nin tubig para sa patubig asin mga embankment ngani maibitaran an paghalangkaw kan tubig o pagbaha.
Mientrastanto, para sa mga parasira, pigsugo kan ahensya na kuanon nin amay an saindang mga nadakop na sira asin ipagpaliban man an pagsisira sa mga lugar na nakakaeksperyensya pa nin makusog na duros asin alon dara kan bagyo.
Saro an DA sa mga ahensya na tinawan nin trabaho kan National Disaster Risk Reduction Management Council (NDRRMC) sa irarom kan Red Status Alert na magtao nin koordinasyon sa saindang operations center para sa tulos asin marikas na paghatod nin ayuda sa mga tawo.
