LEGAZPI CITY—Nagpaluwas na nin pahayag an Catanduanes Police Provincial Office mapadapit sa pagkagadan kan sarong lalaki makalihis na mabadil ini kan saindang kapulisan sa nasambitang probinsya.
Segun ki Police Lieutenant Colonel Rosalinda Gaston, an tagapagtaram kan Catanduanes Police Provincial Office, sa intrevista kan Bombo Radyo Legazpi, na bandang alas-tres nin hapon kan Enero 3 nag-report an sarong kagawad kan Barangay Cabuyoan sa banwaan kan Panganiban sa mga otoridad mapadapit sa sarong lalaking nasa impluwensya nin arak na nag-aamok mantang may darang itak kun saen nagkawsa ini nin takot asin huma sa seguridad kan publiko.
Tulos man na nagresponde an saindang kapulisan sa pangyayari, kun saen naabutan ninda an suspetsado na agresibong pigwawasiwas an darang itak sa tinampo.
Sinabi kan opisyal na pigpakihuronan pa ninda an lalaki, alagad imbes na magkalma sinugod kaini an mga kapulisan, kun saen wara na man na ibang maginibo an mga otoridad kundi an paputukan an suspetsado na tuminama sa may parte kan hawak kaini rason para bawian ini nin buhay.
Dugang kaini na dae man ninda pigbabawalan an pamilya kan lalaki na maghagad nin hustisya huli ta karapatan man ninda ini.
Mantang sa saindang lado padagos man suboot an saindang imbestigasyon mapadapit sa insidente, kun saen nagkundusir man nin hiwalay na imbestigasyon an Provincial Internal Affairs Service.
Pig-asigurar man kan saindang opisina na magkaigwa nin patas na imbestigasyon para padagos man an tiwala asin respeto sa mga kapulisan kan publiko.
Dugang digdi, na pighihiling man ninda an anggulo mapadapit sa mga nai-report na may diperensya sa pag-iisip an suspetsado, na sa ngunyan kaipuhan ninda an record para mapatunayan na an suspetsado may diperensya sa pag-iisip.
Bukas man suboot an saindang ahensya sa ano man na independent investigation para magkaigwa nin transparency asin fairness sa pag-imbestigar sa insidente.
Mientrastanto, nagpaabot na man nin tabang an saindang opisina sa pamilya kan nagadan.
Sa presente, padagos an imbestigasyon kan kapulisan huli ta kaipuhan pa nin iba pang ebidensya mapadapit sa insidente.
