LEGAZPI CITY — Nagpapadagos an ipigkokundusir na pursuit operation kan mga tauhan kan Juban Municipal Police para sa pagkakaarestar sa mga suspek sa pambabadil sa sarong kagawad sa Barangay Lajong, Juban, Sorsogon.
Sa impormasyon na naguno kan Bombo Radyo Legazpi napag-araman na nakatindog an biktimang si Emilio Guab sa entrance kan covered court mantang nagdadalan nin basketball kan biglang maglaog an tulong dae pa nabibistong kalalakihan.
Nagluluwas sa inisyal na imbestigasyon na bigla na sanang buminulnot nin badil an mga ini asin warang habas na pinaputukan an biktima na nagresulta sa tulos na kagadanan kaini.
Makalihis an nasambitan na krimen, tulos na nagdulag an mga suspek lunad kan sarong motorsiklo.
Mientras tanto, segun ki Police Senior Inspector Christine Lorrine, hepe kan Juban PNP, nagpapadagos an saindang imbestigasyon para sa pagkakabisto kan mga nasa likod kan pambabadil asin maaraman an motibo sa krimen.
Narekober man sa pinangyarihan kan insidente an anom na pidaso nin fired bullet asin pitong pisado nin fired cartridges case na isinumiter na sa Crime Laboratory Office para sa Cross Matching Examination.
