LEGAZPI CITY – Ipagpadagos na sana dapat ni Presidente Ferdinand Marcos Jr. an 100% na anti corruption advocacies huli ta wara na siyang choice makalihis niyang buksan an orolay.
Ini an nagin simbag ni Political Analyst Atty. Michael Henry Yusingco sa nagin kahapotan kan Bombo Radyo Legazpi mapadapit sa sitwasyon kan paghagad nin paninimbagan sa mga opisyal kan gobierno sa irarom kan saiyang administrasyon.
Pigtaram niya pa na siya an nagbukas kan orolay sa saiyang State of the Nation Address, an Presidente pa an nag-krear kan Sumbong sa Pangulo website asin dae pinirit kan taumbayan na buksan an isyu kan korapsyon.
Suguon dapat kan Presidente an Department of Budget and Management asin Department of Public Works and Highways na makipagtabangan sa Ombudsman asin isumiter an kinakaipuhang dokumento para sa imbestigasyon kan mga nangyaring anomalya nin warang halong kondisyon.
Pigsuhestyon pa ni Yusingco na mag-appoint an Presidente nin Ombudsman na warang koneksyon saiya nganing mahiling kan publiko na seryoso talaga siya sa 100% na pagpapanimbag sa mga tiwaling pulitiko.
