Inarestar kan National Bureau of Investigation (NBI) ang dating mamamahayag asin television host na si Jay Sonza kan Huwebes nin banggi, Abril 30, sa saiyang harong sa Quezon City katakod kan kasong cyberlibel.
Kinumpirma ni NBI Director Melvin Matibag an pag-aresto sa sarong intrevista, asin sinabing bago isinagibo an operasyon kan madakop si Sonza.
Segun ki Matibag, nagluwas nin warrant of arrest ang Pasay City Regional Trial Court kan Huwebes, na naging basehan nganing arestaron an dating broadcaster.
Presente nang nasa kustodiya kan NBI si Sonza.
Mientrastanto, tulos man na nagpahayag ang abogado ni Sonza na si Atty. Mark Tolentino na mapasiring sita sa opisina kan NBI nganing siertohon na mapoprotehiran an direchos kan saiyang kliyente, urog na saro na ining senior citizen.
Nagpuon an kaso sa reklamong isinunad kan NBI kan Pebrero laban kina Sonza asin vlogger na si Jeffrey Luces Celiz, o mas bisto bilang “Ka Eric Celiz,” huli sa suboot pagpapakalat nin pekeng medical records ni Presidente Ferdinand Marcos Jr.
