Nanindugan an singer-lawyer asin bistadong supporter kan pamilya Duterte na si Jimmy Bondoc na wara siyang pakilabot sa mga nagbabatikos asin nag-cancel sa saiya makalihis mag-viral an pakikipag-olay, pagngirit, asin photo opportunity ninda ni dating Senador Antonio Trillanes IV.
Segun ki Bondoc, pwedesir siyang i-unfollow, lingawan, asin i-cancel, huli ta wara siyang pakiaram.
Nagpoon an reaksyon kan pirang netizen huli sa pagiging bistadong kritiko ni Trillanes sa pamilya Duterte, kabali sinda dating Pangulong Rodrigo Duterte, Vice President Sara Duterte, Davao City Rep. Paolo Pulong Duterte, asin Davao City Mayor Sebastian Baste Duterte.
Sa ibong kan mga puna, pigdoon ni Bondoc na nagdadanay na bilog an saiyang suporta asin paninindugan para sa pamilya Duterte asin sa mga kaalyado kaini arog ni Senador Ronald Bato dela Rosa.
Ipiglatag man ni Bondoc an saiyang tulong pangenot na pangapodan na protehiran sinda Vice President Sara Duterte asin Mayor Baste Duterte kontra sa saindang mga kritiko, asin maiuli sa Pilipinas si dating Pangulong Rodrigo Duterte.
Kasabay kaini, liwat na pigdoon kan singer-lawyer na dapat nang isara an International Criminal Court (ICC) huli sa suboot na panghihimasok kaini sa nacion sa ibong kan pagkalas kan Pilipinas sa Rome Statute kan mga nakaaging taon.
