Magtatalaga an Metropolitan Manila Development Authority (MMDA) nin total na 2,637 tawohan tanganing makatabang sa pagmantenir nin kaayusan asin marhay na paghiro nin trapiko sa mga ruta na aagihan kan mga delegado asin iba pang bisita sa 49th ASEAN Summit.
Segun ki MMDA Traffic Enforcement Group Director III Atty. Victor Ma. Nuñez, magpopoon an deployment kasabay kan mga aktibidad na igwang koneksyon sa ASEAN Summit.
Makikipagtabangan an mga traffic enforcer kan ahensya sa Philippine National Police (PNP) tanganing masierto an marhay na paghiro kan mga behikulo, partikular sa mga tinampo na gagamiton kan mga convoy kan mga delegado.
Kabali sa mga ipapatupad na lakdang an mas mahigot na koordinasyon sa pag-agi kan mga convoy asin paggamit nin stop-and-go traffic scheme tanganing maparikas an pag-usad kan mga behikulo kan mga bisita asin malikayan an dai kaipuhan na pagkaantala.
Katuyuhan kan deployment na masierto an marhay na pagbiyahe kan mga delegado asin mamantenire an daloy nin trapiko sa ibong kan piglalaoman na pagdakol kan mga behikulo sa mga pangenot na tinampo sa Metro Manila.
