LEGAZPI CITY — Nasakote an numero 1 most wanted person sa Rehiyon kan Bikol para sa bulan kan Nobyembre, durante sa mas pinarikas na manhunt operation kan Police Regional Office 5 (PRO5) na isinagibo sa Mobo, Masbate, ngonian na petsa-6 kan Nobyembre, 2026.
Sa pangengenot kan Mobo Municipal Police Station katuwang an mga personahe kan Provincial Intelligence Division 5 kan Masbate Police Provincial Ofice asin an Regional Intelligence Division 5, nagdalagan nin sarong manhunt operation sa Barangay Bagacay, Mobo, Masbate na nagresulta kan pagkadakop sa sarong 50-anyos na suspek.
Naaresto an suspek bandang 10:50 nin aga sa bisa nin Warrant of Arrest para sa kasong murder.
An pagkadakop sa No.1 Most Wanted Person sa bilog na rehiyon nagpapahiling nin dakulang kalumpasan sa tigsasaggibong operasyon kan PRO 5 na hanapon asin arestaron an mga bantog na wanted na tawo asin siguruhon na masangat sinda sa korte na esplikaron an mga kasong saindang tighahampang.
Mientrastanto, nasakote man an iba pang kabale sa listahan kan Most Wanted Person para sa bulan kan Nobyembre hale sa mga manlain-lain na lugar sa bilog na rehiyon.
Kaiba digdi an Rank 9 Most Wanted Person sa Pili, Camarines Sur na naghahampang sa duwang kaso nin sexual assault, an Rank 7 Most Wanted Person na naarestar sa Barangay Antipolo, Minalabac, Camarines Sur na naghahampang sa apat na kaso nin qualified rape by sexual assault, asin an Rank 6 Most Wanted Person na naarestar sa Barangay Sinuknipan I, Del Gallego, Camarines Sur na naghahampang sa duwang kaso nin statutory rape asin violation kan Section 5(b) kan Republic Act No. 7610.
Tigsiguro man kan PRO 5 na padagos an saindang mas pinarikas na kampanya laban sa mga wanted person sa bilog na Rehiyon kan Bikol para sa masiguro an kaligtasan kan mga komunidad asin sa pagpapatupad nin marhay na serbisyo sa publiko.
via | 𝗕𝗼𝗺𝗯𝗼 𝗥𝗮𝘀𝗵𝗶 𝗔𝗿𝗰𝗶𝗴𝗮
