LEGAZPI CITY- Nasa kustodiya na kan Police Regional Office 5 an nasa 765 na badil na expired an rehistro sa bilog na Bicol ngonian na alas 2:00 nin hapon, Nobyembre 3, 2026.
An nasabing bilang resulta kan pinakusog na kampanya kan PRO 5 na Accounting and Disposition of Firearms with Expired Registration (ADFER) Campaign kontra loose firearms.
Sa 765 na badil, 535 kaini an boluntaryong dineposito kan mga tagsadiri para sa safekeeping mantang 230 an boluntaryong sinuko sa pulisya.
Kadaklan sa mga badil iyo an Kalibre .45, .38, asin 9mm.
Parte ini kan PROJECT KASUROG: BANTAY BARIL katabang an Regional Civil Security Unit (RCSU) 5 ngani masiguro na an kada badil naka-rehistro susog sa batas.
Nangapudan si PRO 5 Director PBGEN Randy Glenn Silvio sa publiko na makipagtabangan ngani maibitaran na magamit an mga badil sa krimen asin mamantenir na ligtas an komunidad.
