LEGAZPI CITY – Pinagiromdom kan sarong abogado an mga gun owners na pribilehiyo sana asin bakong karapatan an pagsasadiri nin badil sa Pilipinas na bakong arog sa Estados Unidos.
Segun kay Atty. Alberto Besinal, base sa Republic Act 10591, kinakaipuhan magkaigwa muna nin lisensya antes makabakal asin makapagsadiri nin badil.
Huli digidi, obligasyon kan lambang gun owner na irehistro an badil asin i-renew an License to Own and Possess Firearms (LTOPF) kun expired na.
Kun pighuhugakan suboot na mag-renew, mas maray suboot na i-deposito na sana an badil sa Philippine PNP asin bako na i-surrender, ta an deposito nangangahulugan na gusto pa nindang ibalik an badil, mantang an surrender boot sabihon na wara nang interes.
Suportado ini kan kampanya kan Police Regional Office (PRO) 5 kun sain uminabot na sa 8,600 firearms an na-account sa Bicol paagi sa field verification, kun sain nangengenot an Catanduanes Police Provincial Office (PPO) na may 96.5% completion rate.
Nangapodan man si Besinal sa mga gun enthusiasts na magin responsable sa pagkapot kan badil asin suportaran an gun safety project kan gobyerno.
