Liwat na ipapautob kan Senate Impeachment Court an Rule 18 o sub judice rule manungod sa gabos na artikulo kan impeachment na isinangat laban ki Bise Presidente Sara Duterte, kabale na an mga dati nang binawi kan piskalya.
Sa bagong ruling ni Presiding Officer Francis “Chiz” Escudero ngonian na aldaw, liwat na nagboot an impeachment court sa gabos na partido na maglikay sa pagpaluwas nin impormasyon o paggibo nin mga pahayag sa publiko manungod sa merito kan arin man sa mga artikulo, nakabinbin man ini o binawi na.
Kasunod ini kan manipestasyon na isinangat kan depensa kan Nobyembre 4, kun saen an kampo ni Duterte nag-asegurar na dai kaini pigsusuko an Rule 18, asin dapat ining mamantenir tanganing maprotehiran an integridad kan mga prosisyon asin an mga karapatang konstitusyonal kan Bise Presidente.
Sa irarom kan Rule 18, wara nin partido—kaiba an mga senator-judges, an prosekusyon, an defense team, asin an saindang kanya-kanyang legal na abogado—an tinotogotan na magtao nin pampublikong komentaryo o magbuyagyag nin impormasyon manungod sa mga merito kan nakabinbin na impeachment trial.
Huli kaini, nagpaluwas an korte nin panibagong patanid na an siisay man na magbalga kan pagboot na ini hahampangon an maninigong mga padusa, susog sa mga giya na itinao sa nakaaging desisyon.
Maroromdoman na kan Oktubre 13, binawi kan House prosecution panel an tulo sa apat na artikulo kan impeachment kontra ki Duterte, kabale digdi an Article I o suboot salang paggamit kan confidential funds, Article III mapadapit sa panunuhol, asin Article IV manungod man sa grave threats.
Sa presente, article 2 na sana o an suboot dai maipaliwanag na yaman kan Bise Presidente an nakabinbin sa korte na nakatalaan na atubangon kan depensa sa saindang pagpresentar nin ebidensya sa Nobyembre 9.
