LEGAZPI CITY—Nagpahayag nin ‘concern’ an sarong political analyst sa pag-withdraw kan prosekusyon sa tulong articles of impeachment kontra kay Vice President Sara Duterte.
Segun ki Prof. Dennis Coronacion, sa intrevista kan Bombo Radyo Legazpi, na dapat kuta matawan nin interest of due process, na dapat tawan nin pagkakataon an kampo ni VP Sara na simbagon an mga paratang sa mga ni-withdraw na articles of impeachment.
Posible suboot na may pigsusunod na time frame an prosekusyon kaya kaini ni-withdraw an mga nasabing articles of impeachment huli sa pwedesir mahaluyan na maadalan ini kan senator-judges asin masimbagan kan defense panel.
Dugang niya na posible man nahahadit an prosekusyon asin majority senators na abuton ini nin eleksyon urog na an mga re-electionist huli sa posibleng mawara an pagigin ‘independent-minded’ kan mga ini asin maghagad nin tabang ki VP Sara nganing liwat na manggana.
Paliwanag niya na pwedesir man na nagdugang an kumpiyansa kan prosekusyon sa pag-withdraw huli sa may naglipat na senator-judge sa mayorya kan Senado urog na sa pagbago kan voting threshold.
Nagmamawot man si Coronacion na dapat iniba man liwat an pagtukar sa iregularidad asin liquidate kan confidential funds ni VP Sara bilang bise presidente asin dating kalihim kan Department of Education.
Sinabi man kaini na kaya ni-pull out kan prosekusyon an nasabing mga articles huli sa dae suboot naikonektar kan prosekusyon an mga ebidensya ki VP Sara mismo o boot-sabihon na an mga kwartang nawawara an napaduman sa bank accounts kan opisyal.
