LEGAZPI CITY- Pigkwestyon ni dating ACT Teachers Party-list Representative France Castro an desisyon kan prosecution panel na bawion an tulo sa apat na impeachment articles laban ki Vice President Sara Duterte.
Kan Oktubre 13, inaprubaran kan Senate Impeachment Court an mosyon kan House Prosecution na iatras na an mga alegasyon manungod sa confidential funds, bribery, asin grave threats.
Natada na sana an Article II na nagtutukar kan suboot dai maipaliwanag na kayamanan, mga isyu manungod sa Statements of Assets, Liabilities asin Net Worth (SALN), asin an dai pag-divest kan mga interes sa negosyo kan bise presidente.
Sa intrevista kan Bombo Radyo Legazp, nagpahayag si Castro nin pagkabigla sa lakdang huli ta nagtutubod siya na an prosekusyon nagpresentar nin makusog na ebidensya asin mga testigo manungod sa confidential funds.
Tinawan niya nin duon an importansya kan pagpanimbag sa arin man na opisyal kun mapatunayan an salang paggamit kan pondo kan publiko.
Dawa ngani sinabi kan prosekusyon na an lakdang may katuyuhan na maparikas an paglilitis asin mapadali an desisyon kan mga senator-judges, nasasayangan si Castro sa mga testigo na nagtao kan saindang mga testimonya, huli ta an artikulo sa impeachment na pinag-oolayan dai na pwedeng ipagpadagos.
Alagad, an mga alegasyon laban sa Bise Presidente dai katumbas sa pinal na hatol. An natatadang artikulo nin impeachment maagi sa pagsiyasat kan Senate Impeachment Court, na iyo an madeterminar kun sapat an ebidensya para sa conviction.
