LEGAZPI CITY– Nairehistro an panibagong pagbuga nin abo hale sa Bulkan Mayon kan Martes nin aga, Nobyembre 3, dakong alas-8:22.
Segun kay Mayon Volcano Observatory OIC Doreen Abelinde, sa intrevista kan Bombo Radyo Legazpi, uminabot sa 1,700 metro an langkaw kan abo poon sa bunganga kan bulkan asin dinara ini kan paros pasiring sa timog-kanluran kan Albay.
Sa nakaaging 24 oras, nakapagrehistro nin 13 volcanic earthquakes kabale an minor strombolian activity maagahon nin Martes.
Nairehistro man an halangkaw na sulfur dioxide emission na uminabot sa 1,751 tonelada na indikasyon na igwa pang magma sa hababaw na parte kan bulkan.
Pig-eksplikar man ni Abelinde na an presenteng aktibidad kapareho kan nangyari kan nakaaging Oktubre 30, kun saen temporaryong nabara an gas vent rason kan natipon na pressure asin nagluwas nin abo.
Huli kaini, dai man pighahale an posibilidad na mangyari giraray an kaparehong pagtuga sa mga masunod na aldaw o semana.
Padagos na pigbabantayan an ground deformation, na nagtetenir na inflated na buot sabihon igwa pang materyal na kaipuhan na iluwas sa bulkan.
Sa ngonian, nagtetenir man giraray sa Alert Level 3 an Bulkan Mayon puon pa kan Biyernes.
Mahigot pa na ipigbabawal an paglaog sa 6-kilometer Permanent Danger Zone mantang pig-aabisuhan an mga residente na mag-ingat sa posibleng ashfall sa paagi kan pagsulot nin face mask asin pagtenir sa laog kan harong.
