LEGAZPI CITY- Ipig-ebakwar kan lokal na gobierno kan Tabaco City an nasa 233 na pamilya o 849 na mga residente makalihis an panibagong aktibidad kan bulkang Mayon.
Segun ki Tabaco City Disaster Risk Reduction and Management Office Head Gel Molato sa intrevista kan Bombo Radyo Legazpi na an mga nasabing residente an nasa laog kan 6km radius permanent danger zon.
Napag-araman na dinara an mga ini sa mga designated evacuation centers ngani na dae na gumamit pa kan mga classrooms ngani na dae maulang an pag-aadal kan mga estudyante.
Sa presente sinabi kan opisyal na padagos an paghahatod nin family food packs sa mga apektadong residente, sa pagtatabangan kan lokal na gobierno asin Department of Social Welfare and Development (DSWD).
Sinabi ni Molato na sa presente pigtatrabaho na man kan Agriculture office an pagtabang sa mga displaced farmers ngani na mapaabutan nin pangenot na asistensya an mga ini.
Katakod kaini, padagos man an pagirumdom kan opisyal sa mga residente kan ibayong paglilikay.
