LEGAZPI CITY- Dae pinaghahali kan Philippine Institute of Volcanology and Seismology (PHIVOLCS) an posibilidad na mautro an nangyaring October 30 eruption kan bulkang Mayon.
Segun ki Mayon Observatory Resident Volcanologist Doreen Abelinde sa intrevista kan Bombo Radyo Legazpi na pinaglalaoman an paminsan-minsan na mga ash emmission events, explosion events, rockfall, asin pyroclastic density currents.
Ini urog pang nakataas man liwat an alert level 3 status sa bulkang Mayon.
Aminado man an opisyal na dae pa mataram ngunyan kan ahensya kun hasta nuarin na naman madurar an aktibidad kan bulkan huli sa panibagong pattern kaini.
Paliwanag ni Abelinde na estimated ninda na naubos na an materyales sa Mayon volcano huli sa kadaklan kan ibinuga kaini puon kan Enero, alagad dae pigpensar na igwa pang natatada na posibleng iyo pa an ipigbubuga sa nakalihis na mga aktibidad.
Dagdag pa kan opisyal na wara man sindang nahihiling na senyales na nagsasakat na panibagong magma sa ngunyan.
Mientras tanto, padagos man kaining pigpapalikay an publiko sa paglaog sa 6km radius permanent danger zone huli sa huma kan nasabing bulkan.
