LEGAZPI CITY- Mahigot na nakatutok an gobierno provincial kan Albay sa aktibidad kan bulkang Mayon.
Segun ki Albay Governor Noel Rosal na basado sa pakikipag-olay niya sa Philippine Institute of Volcanology and Seismology, napag-araman na padagos an paghuhubag kan bulkan kaya dae pinaghahali an posibilidad nin pagkakaigwa liwat nin eruption.
Nagpagirumdom man an gobernador na ‘no human activity’ sa laog kan 6km radius permanent danger zone ngani na maibitaran an anuman na dae pinaglalaoman na insidente.
Ini suboot an rason kaya tulos na ipig-ebakwar an mga residente na nagtetenir sa 6km PDZ, makalihis na itaas an antas kan bulkang Mayon sa alert level 3.
Napag-araman man na igwang mga residente na natawan na nin permanenteng resettlement kaya dae na isinabay sa numero kan mga evacuees.
Mientras tanto, pinayuhan man ni Rosal an publiko na magtenir na kalmado an gabos alagad naka-alerto, kasabay pa kan pagsunod sa mga otoridad.
Sinierto man kan gobernaro na warang problema sa ngunyan sa paghahatod nin pagkaon sa mga apektadong residentes.
