LEGAZPI CITY- Nagpatanid an Philippine Institute of Volcanology and Seismology na posibleng magpadagos pa an aktibidad kan bulkang Mayon, makalihis an nagkapirang beses na pagbuga kaini nin abo.
Segun ki Phivolcs Monitoring and Eruption Prediction Division Chief Mariton Bornas sa intrevista kan Bombo Radyo Legazpi na maski pa nagpundo na an mga materyales sa porma kan lava flow, igwa pa nin nakatambak na magma sa daluyan nin lava asin nagpapakawala pa nin volcanic ash sa irarom kan magma chamber.
An nairehistro ash emission sa nakalihis na mga aldaw an may koneksyon suboot sa pagbuga kan volcanic gas hali sa crater kan Bulkang Mayon.
Dagdag pa kan opisyal na hasta sa ngunyan, dae pa nagbababa an sulfur dioxide emission kaya nagtetenir man sa alert level 2 ang status kan bulkan.
Segun ki Bornas na an halangkaw na sukol kan sulfur dioxide an hudyat na igwang panibagong magma sa irarom kan bulkan.
Aminado man an opisyal na kakaiba an aktibidad kan Mayon volcano ngunyan na taon kaya dae dapat magpaka kampante.
