LEGAZPI CITY– Generally peaceful an nagin selebrasyon kan Undas 2026 sa probinsya nin Albay segun sa Albay Police Provincial Office.
Segun ki PMAJ Kharren Formales, PIO kan Albay PPO, sa intrevista kan Bombo Radyo Legazpi, na poon Oktubre 30, naka-full alert status an Albay PPO asin nag-deploy nin 1,355 personnel hali sa manlaen-laen na units.
Afuera sa mga police stations sa mga munisipyo, nagdeploy sinda nin mga personahe sa mga sementeryo, memorial parks, columbarias, police assistance desks, advance command posts, simbahan, major thoroughfares, transportation hubs, terminals, tourist spots, mobile patrols asin border control checkpoints.
Zero report man an insidente manungod sa mga nagdadara nin ipigbabawal na bagay sa sementeryo huli sa mas pinakusog na information dissemination asin awareness campaign sa social media accounts kan PNP.
Nasa 164,415 an estimated number kan mga nagbisita sa mga sementeryo kan Domingo mantang 9,658 sana kasuodma hasta alas 12 nin udto base sa monitoring.
Padagos an deployment kan PNP hasta kasuodma asin kada tolong oras igwang monitoring kun igwa pa nin dagdag na tao sa mga sementeryo.
Nagsagibo man nin inisyatibo an Albay PPO na “Kandila” kun sain nagtao sinda nin haros 1,200 kandila na may mga sticker nin safety tips sa Pawa Public Cemetery sa Legazpi asin sa Tagas Public Cemetery sa Tabaco City.
