LEGAZPI CITY– Nagreklamo an transport sector sa Sorsogon huli sa hababang kita ngonian na Undas kumpara kan nakaaging taon huli sa halangkaw na presyo kan produktong petrolyo.
Segun kay Sorsogon Integrated Transport Federation President Ramon Dealca, sa intrevista kan Bombo Radyo Legazpi, diit sana an mga nagbyahe mantang an iba nagtitipid huli ta nag-aabot na sa P98 an litro kan diesel sa Shell asin Caltex.
Ordinaryong aldaw sana suboot an naging benta ninda maski igwang okasyon na Undas, bako arog kan dati na dakol an pasahero asin halangkaw an kita.
Dai suboot sapat an P1 rollback sa diesel asin kaipuhan an P3 hasta P4 na rollback nganing maka-ahon an mga driver ngonian na parani na an Pasko.
Nangaodan sinda sa gobyerno asin sa DOTr na magtao nin tunay na tabang asin bakong P12 discount sana sa gasolinahan.
Binatikos man niya an PUV Modernization Program na suboot sala an pagkaka-programa kaini huli ta P2.8M hasta P3.1M an presyo kan modernized jeep asin kooperatiba sana an nagkakapakinabang, bako an mga operators.
Sa Sorsogon, sobra 100 na an modernized jeeps asin diit na sana an traditional, alagad may problema sa overlapping kan ruta huli ta dae nasusunod an Local Public Transport Route Plan.
