LEGAZPI CITY- Kinumpirmar ni Tabaco City Disaster Risk Reduction and Management Office (CDRRMO) Head Gel Molato sa intrevista kan Bombo Radyo na tapos na an mandatory evacuation kan 242 pamilya o 858 indibidwal kan nakaaging Biyernes alas 5:00 nin hapon.
Hale sinda sa 5 barangay na yaon sa laog kan 6KM danger zone kan Bulkan Mayon, iyo an Magapo, Buang, Oson, Mariroc, asin Buhian.
Nagtitinir sinda ngonian sa 4 evacuation centers asin binisita na sinda kan Office of Civil Defense (OCD), Department of Social Welfare and Development (DSWD), asin Mayor Ray Bragais para sa food packs asin supplies.
Apwera digdi, igwa pang 298 families na economically displaced na may housing units na sa Manawari Resettlement.
Inanunsyo man ni Molato an enot sa Albay na Emergency Go Bags para sa 3,800 households sa San Miguel Island sa Tabaco na igwang first aid kit, transistor radio, flashlight asin whistle.
Pagirumdom man kan CDRRMO na mag-ingat asin magkuang impormasyon sa mapagkakatiwalaang sources huli ta padagos pa an pag-alboroto kan Mayon.
