LEGAZPI CITY-Nagsagibo tulos nin flushing operation an Bureau of Fire Protection Bicol sa mga kalsadang apektado kan pagbagsak kan mahiwasang ashfall hale sa Bulkang Mayon.
Segun kay BFP Bicol Regional Director Senior Superintendent Achilles M. Santiago, sa intrevista kan Bombo Radyo Legazpi na nagdeploy sinda nin mga personahes ngani tabangan an MDRRMO asin DPWH sa pagsasagibo nin flushing operation sa mga kakalsadahan para sa seguridad kan mga biyaheros.
Basado sa huring datos kan ahensya, nasa 26,654 na mga pamilya o 91,225 na indibidwala an apektado sa Guinobatan, Albay.
Dagdag pa kan opisyal na sa presente, nagsasagibo na nin miting an Office of the Civil Defense asin response cluster, siring man nakastandby na an saindang personahes para sa iba pang direktiba.
Nakahanda na man an 100 fire trucks na pwedisir magamit sa anumang oras sa pagresponde sa Camalig asin Guinobatan area.
Padagos man na naka-monitor an saindang tropa sa iba pang lugar, kabale an Daraga, Libon, Ligao, Polangui, Tabaco, Malinao, asin Malilipot.
Pagirumdom kan opisyal na magin handa asin mag-apod sa pinakaharaning fire station o makipag-koordinar sa mga barangaf officials para sa anumang pangangaipo ngani matawanan nin pansin kan lokal na gobierno.
