LEGAZPI CITY- Kinumpirmar ni FO1 Eric Gepte Jr., Chief kan Public Information Unit kan Bureau of Fire Protection (BFP) Albay, sa intrevista kan Bombo Radyo Legazpi, na tapos na an saindang flushing asin clean-up operation kan ashfall hale sa Bulkan Mayon.
Sarong firetruck sana an ginamit na may kargang apat na libong litro nin tubig kada byahe.
Naka-tolong balik sinda kaya uminabot sa dose mil na litro an nagamit sa banwaan kan Guinobatan.
Mantang wara man nin apektadong barangay base sa saindang monitoring sa banwaan kan Camalig.
Kasunod kan paglangkaw kan Mayon sa Alert Level 3, nagtaas na an Albay hale sa Blue Alert pasiring sa Red Alert poon Oktubre 30 hasta Nobyembre 3.
Naka-standby man an mga kataraid na probinsya kan Camarines Sur asin Sorsogon, asin padagos an saindang koordinasyon sa mga Municipal Disaster Risk Reduction and Management Office (MDRRMO) para sa dugang na paglinig.
