LEGAZPI CITY- Kontrolado asin marhay an dalagan kan trapiko sa mga kamposanto sa banwaan nin Daraga ngonian na Undas.
Ini an kinumpirmar ni Daraga Public Safety Office Deputy Chief Dominador Bongalonta, kasunod kan pag-deploy kan mga enforcers sa mga mayor na kamposanto sa Binitayan, Bañag Junction, asin iba pang parte kan banwaan.
Segun ki Bongalonta, obheto kan deployment na irayo an mga behikulo sa highway asin mga tinampo pasiring sa mga kamposanto asin maseguro an kaligtasan kan mga naglalakaw pasiring sa sementeryo partikularmente an mga residente kan Binitayan asin Bañag.
May total na 34 na mga traffic enforcer an ipinadara: 12 para sa enot na shift, 15 para sa ikaduwa, asin 7 para sa ikatolong shift poon alas 11:00 nin banggie hasta alas 7:00 nin aga.
Wara nin seryosong insidente an nairehistro na may koneksyon sa trapiko.
Igwa nin mga report na may mga indibidwal na naglulukso sa mga kudal sa likod kan sarong sementeryo, alagad tulos na naresolberan an mga ini sa tabang kan Philippine National Police (PNP), Municipal Disaster Risk Reduction and Management Office (MDRRMO), asin kan Bureau of Fire Protection (BFP), na gabos nakadeploy man sa lugar.
Kinumpirmar man kan opisina na wara pang naresibeng reklamo manungod sa overcharging kan pamasahe sa bus asin padagos an mga paghihingoa sa pagbantay sa koordinasyon kan PNP asin iba pang ahensya.
An seguridad sa mga sementeryo iyo an magiging pangenot na pokus ngonian na aldaw, kasabay kan huring aldaw kan night market.
