Nangapudan si Senator Francis “Kiko” Pangilinan sa Philippine National Police (PNP) na ipautob an maximum tolerance asin igalang an deretso kan mga namamanwaan na magsagibo nin matuninong na protesta.

Segun sa senador, importante an pagmantenir kan orden asin seguridad kasabay kan pagsierto na protektado an deretso kan lambang Pilipino na malayang magpahayag kan saindang mga saloobin.

Pigdoon ni Pangilinan na kapwa Pilipino an mga pulis asin mga nagpoprotesta na pareho an katuyuhan, kabali na an disenteng pagbuhay, ligtas na komunidad, asin mas marhay na futuro kan saindang mga pamilya.

Huli kaini, hinagad niya sa mga pulis na atubangon an matoninong na mga nagpoprotesta na igwang pagsabot, pagpopogol, asin paggalang.

Pigduon man kan senador na dae dapat pugulan an matoninong na mga protesta durante kan pag-abot kan mga lideres asin delegado hale sa manlaen-laen na nasyon para sa ASEAN Summit.

Imbes, pagkakataon suboot ini na maipahiling sa internasyunal na komunidad na parte kan demokrasya sa Pilipinas an libreng ekspresyon asin pagrespeto sa manlaen-laen na pananaw.

Nanindugan si Pangilinan na dapat masierto an kasalbadohan kan gabos mantang tinatawan nin pagkakataon an lambang Pilipino na maipaluwas an saindang mga agrangay.