LEGAZPI CITY—Padagos an pagkundusir nin water rationing activities kan Bureau of Fire Protection sa nagkapirang barangay sa banwaan kan Guinobatan nganing makatabang nin tabang asin masierto na may suplay nin tubig para sa mga apektadong residentes.
Segun ki BFP Guinobatan Municipal Firemarshal Fire Inspector Warren Orendain, sa intrevista kan Bombo Radyo Legazpi, tulos man nindang pigrespondehan oras na may naghahagad saindang magpapa-water rationing sa pakikipagkoordinar sa Municipal Disaster Risk Reduction and Management Office Guinobatan.
Segun saiya na sa presente an Barangay Travesia an nagkakaigwa nin kakulangan sa suplay kan tubig.
Pig-asigurar man kan opisyal na preparado sinda sa pagresponde sa oras nin kasulo kun sain may 24/7 sindang naka-duty na personahes, 2 firetruck asin 1 ambulansya magin an water tanker kan lokal na gobierno kan gobierno kan Guinobatan.
Mientrastanto, pagiromdom man ni Orendain sa publiko na magsunod sa mga abiso kan saindang mga personnel nganing malikayan an anumang insidente siring kan kasulo.
