LEGAZPI CITY-Itinaas na an heightened alert kan Department of the Interior and Local Government (DILG) sa mga Local Government Unit (LGU), partikular sa Hilagang Luzon asin iba pang hazard-prone areas, huli sa pinagbabantayang posibleng paglaog kan Super Typhoon Bavi sa Philippine Area of Responsibility (PAR).
Sa ipinaluwas na pahayag kan ahensya, ipigsugo an mga lokal na gobierno na ihanda an saindang disaster response mechanisms asin siertuhon na preparado an mga komunidad na nasa halangkaw na peligro enkaso maglala an sitwasyon.
Segun pa sa ahensya, panahon na nonian ngani maghanda asin magsagibo nin lakdang nin mas amay ngani maprotehiran an mga residentes.
Enot nang nagtaas nin heightened alert an National Disaster Risk Reduction and Management Council (NDRRMC) bilang paghahanda sa pinaglalaomang epekto kan bagyo.
Mientras tanto, segun sa Department of Social Welfare and Development (DSWD) na nakahanda na sinda na magtao nin ayuda asin iba pang kaipuhang tabang sa mga indibidwal asin pamilyang posibleng maapektaran.
Enkaso tuluyang makalaog sa PAR an Super Typhoon Bavi, papangaranan ining bagyong “Inday.”
Basado sa pinakahuring report kan state weather bureau, piglalaoman na makalaog an bagyo sa Philippine Area of Responsibility ngonian na banggi nin Martes o magahon saaga, aldaw nin Miyerkules.
