LEGAZPI CITY-Nagpatanid an Albay Public Safety and Emergency Management Office (APSEMO) sa mga Albayanos na magsulot nin face masks makalihis an namataang haze na dara kan padagos na forest fires sa Indonesia.
Mantang nag-iiral an Southwest Monsoon o Habagat, nadadara kaini an haze o an nasabing peligrosong parus pasiring sa nacion.
Segun ki APSEMO Head Bobby Cristobal, sa intrevista kan Bombo Radyo Legazpi na naapektaran kaini an air quality sa albay kun sain presenteng nasa moderate status ini huli sa nasabing epekto kan haze.
Padagos an close monitoring kan ahensya asin nakapag-barewas na sinda nin facemask katuwang an Office of the Civil Defense.
Pig-aabisuhan man an gabos na magin vigilante asin maggamit nin facemask enkaso maluwas huli ta hababa an kalidad kan parus sa Albay.
An nasambitang haze, iyo an pagkakaigwa nin small particle sa parus huli sa forest fires sa Indonesia kun kaya naapektaran kaini an air quality.
Nakahanda man an ahensya na magtabang enkaso igwang naapektaran kaini.
Nagpatanid man an opisyal na dai mag-panic, magsulot nin facemask, asin mag-ingat sa posibilidad kan epekto kaini.
