Rinibong mga estudyante sa Indonesia an nagkasaar nin mahewasang protesta kawsa kan pagkadismaya sa simbag kan gobierno kaini sa naglalalang haze sa nacion asin Southeast Asia kan mga nakalihis na semana.
Kan Biyernes, nasa 500 an nakisumaro sa protesta sa luwas kan Central Kalimantan Governor’s Office sa kabisera kan Palangkarya bitbit an saindang mga pangapudan para sa solusyon sa naglalalang haze puon pa kan Agosto.
Kinalampag na man kan nagkapira si Indonesian President Prabowo Subianto na magdeklara nin national emergency asin maggibo nin mas epektibong lakdang nganing pugulan kan mga agricultural practices na pigkonsiderar na rason kan forest fires.
An nasabing haze an kawsa kan mga forest fires na lumalaganap sa manlaen-laeng parte kan nacion, kabale sa isla kan Borneo kun sain dakol an nairehistrong kaso nin kasulo.
Komon nagpupuon sa Indonesia an mga nasabing forest fires kada bulan kan Abril sa panahon kan tagmara kun sain labi 333,470 na residente sa pitong probinsya kan Indonesia an nairehistrong nagkaigwa nin acute respiratory illnesses, susog sa Ministry of Health kan nacion.
Labi man kaining naapektaran an kalidad kan paros kan mga kataning na nacion siring kan Singapore, Malaysia, asin iba pang estado sa Timog-silangang Asya.
