Kinontra kan defense team ni dating Presidente Rodrigo Duterte an kahgagadan kan prosekusyon kan International Criminal Court (ICC) na akuon bilang ebidensya an mga enot na nairehistrong testimonta kan duwang testigo sa kasong crimes against humanity na pigkakahampang niya.
Ipigduon kan depensa na dapat na magsairarom sa cross-examination o paghahapot kan ibong na lado sa korte an mga nasabing testigo.
Sa sarong pampublikong dokumentong igwang mga parte na dae inilantad, na igwang petsang Oktubre 26, hinagad kan depensa sa ICC Trial Chamber III na sayumahan an kahagadan kan prosekusyon na akuon an mga enot na nairehistrong testimonya kan mga testigo na sinda P-1393 asin P-1416.
Sa ibong kaini, wara man na pagkontra an depensa sa pagresibe niya bilang ebidensiya sa testimonya kan ikatulong testigo na si P-1370.
Segun sa depensa, nagtutukar an mga testimonya ninda P-1393 asin P-1416 sa mga isyu na importante sa kaso.
Huli digdi, ipigduon nindang kaipuhan pang pag-adalan nin marhay asin haputon an mga testigo ngani na masukol an kredibilidad kan saindang testimonya.
Hinagad kan prosekusyon na akuon bilang ebidensya an mga enot na testimonya kan tulong testigo susog sa Rule 68(2)(b) kan Rules of Procedure and Evidence kan ICC.
Pigtutugutan an nasabing polisiya an pagresibe sa mga enot na naitalang testimonya sa irarom kan partikular na kondisyon, maski dae maghampang sa korte an mga testigo.
