Buminagsak pa sa panibagong record low na P64 kontra dolyar an piso sa intraday trading ngunyan na Martes, Oktubre 27, 2026.
Basado sa datos kan Bankers Association of the Philippines, nagbukas an local currency sa P63.95 antes dagos na nagsakat sa antas na P64 kontra sa US dollar bandang alas-11:05 nin aga.
Marurumduman na nagsarado man sa record low na P63.95 an piso kan Lunes makalihis an padagos na pagluya kaini sa merkado.
Segun ki Will Cabangon, presidente kan sarong stock brokerage firm, an pagluya kan piso an magkakawsa nin pakinabang sa mga kumpanyang igwang dakulang ganansya sa dolyar.
“When you convert those dollars into pesos, the weaker the peso gets, the more earnings that they have,” pahayag ni Cabangon dapit sa positibong epekto kaini sa mga dollar earner.
Pinayuhan man niya an mga mamumuhunan sa stock market na mag-abang sa mga bargain huli ta nagkapira sa mga ini an high quality companies.
Dugang pa ni Cabangon na paborito man liwat an mga utility company asin nagtutubod na magbabalik an kusog kaini kun magpundo an Bangko Sentral ng Pilipinas sa pagtataas kan interest rates.
“I think we’re getting to the pain points now, where the BSP will consider slowing down interest rate hikes. So once that stops, I expect the utilities to bounce back with a vengeance.” dagdag pa ni Cabangon.
Mientras tanto, tinawan duon man kan financial analyst na si Rogel Morales na alagad igwang potensyal na makabawi an local currency, an presenteng paghiro kaini an nakadependa sa mga pangkinaban na trend sa merkado.
Partikular na tinukoy ni Morales an agresibong pagkusog kan US dollar bilang pangenot na rason kan pagsadsad kan piso sa hibabang antas.
