LEGAZPI CITY-Ipighayag kan Swiss firm na IQAir na an Toronto an igwang pinakamaraot na kalidad nin parus sa gabos na pangenot na ciudad sa kinaban.
Pigeenganyar man kan mga otoridad kan Canada an mga tawo na magtenir sana sa laog kan saindang mga harong.
Naungusan kan Toronto an kabisera kan Democratic Republic of Congo na Kinshasa asin New Delhi dahil sa polusyon sa parus, dara kan aso kan wildfire na nagreresulta sa paninilaw kan kalangitan sa pinakadakulang ciudad kan Canada.
Mantang medyo maluya na wildfire season ngonian na taon, kumpara sa danyos na kawsa kan nakalihis na taon, igwang labi sa 800 naaktibong kasulo sa bilog na nacion.
An mga aso hale sa mga kasulo sa northwestern Ontario, nagbaba na sa Toronto, an kabisera kan probinsya.
Pigenganyar man kan lokal na otoridad an mga tawo sa laog kan harong asin punduhon na an mga summer camp na programa sa luwas ngani maprotehiran an mga joven digdi.
Kinansela man kan mga opisyal kan ciudad an mga aktibidad kan FIFA fan festival para sa semi-final match ngonian kan England asin Argentina.
An matinding init asin humidity sa Mountain West nagkalat poon sa East Coast kan Estados Unidos asin Ontario.
Sa ngonian, an mga kasulo sa kabuludan sa Canada tumupok nin 1.9 milyong ektarya ngonian na taon.
