LEGAZPI CITY-Nagpaotob an Estados Unidos nin mga bagong taripa sa mga 60 trading partnersna nag-aako kan haros gabos na mga importasyon na produkto kaini.
An lakdang na ini basado sa mga alegasyon na nabigo an mga nacion na ini na pugulan an paglaog kan mga produktong gibo sa forced labor.
Segun sa Office of the US Trade Representative, an mga nasyon na nagkomiter na mag-implementar kan ban sa forced labor imports mapapasairarom sa 10% na taripa, mantang an mga dai pa nakasunod, mahahampang sa mas halangkaw na 12.5%.
An bagong polisiya kabali an UK, China, European Union, Canada, Japan, asin India.
Segun kay US Trade Representative Jamieson Greer na an lakdang iyo an “kapinunan kan pagtanos kan pag-abuso sa mga direchos pantawo asin mga baluktot na gawi komersyo.” Dugang pa kaini na katuyuhan kaini na mapakarhay an mga trabahador sa bilog na kinaban.
An mga bagong taripa parte kan mas mahiwas na estratehiya ni US President Donald Trump na nagpukaw giraray nin sarong pankinaban na gera sa komersyo poon kan siya magbalik sa White House.
Kan nakaaging taon, an Korte Suprema kan Estados Unidos, hinale an nagkapirang taripa na ipinapasunod sa irarom kan emergency powers, kun kaya naghanap an administrasyonnin ibang legal na paagi.
Mientrastanto, nagkapirang nacion, kabali an Brazil, Japan, asin Australia, an nagpahayag nin pagkadisganar sa lakdang kan Washington.
Inapod man kan Brazil an mga taripa na “arbitraryo” asin naghuma na magbalos sa irarom kan ley.
Sinabi kan mga eksperto na an mga taripa, piglalaoman na makakadagdag sa mga gastos para sa mga negosyo asin konsumidor kan Estados Unidos, mantang posibleng mabawasan an epekto huli sa exemptions kan nagkapirang produkto.
An mga bagong taripa, nagpapahiling na an administrasyon ni Trump determinado na padagos na gamiton an mga trabaho bilang mayor na armas kan polisiya sa komersyo.
