LEGAZPI CITY-Nag-viral kamakailan sa social media an Mexican President na si Claudia Sheinbaum asin inomaw siya sa saiyang paglunad sa economy flight sana ngani mag-atendir sa regional summit sa Shenzhen, China.
Mantang an mga world leaders ngonian na semana an pasiring sa Chinese city para sa Asia-Pacific Economic Cooperation meetings (APEC), kadakol sa sainda an nag-abot lunad kan mga espesyal na “chartered commercial airliners” o “government aircraft”, arog ni President Donald Trump na Air Force One.
Alagad, si Sheinbaum, naggamit sana nin economy class gikan sa Mexico City pasiring sa Shenzhen, China Southern Airlines flight, basado sa mga media reports.
Nag-abot siya sa China kan aldaw nin Lunes.
Kadakol man na post sa Chinese social media platform an nagpahiling sa Mexican leader sa eropuerto mantang nakikipag-olay sa ibang mga pasahero, alagad piglilinaw pa an ibang mga ladawan kaini.
Sarong hashtag man an nag-viral sa saiyang pag-abot sa China, na nakatipon nin 10.2 million views kan Miyerkules nin banggi.
Sarong video na pig-post niya, nagpahiling nin pagtao nin respeto kan Chinese officials asin schoolchildren makalihis siyang mag-abot sa airport bus.
Kadakol na social media users man an nagpaabot nin pag-omaw kay Sheinbaum sa desisyon kaining maglunda sa economy class sa sarong komersyal na eropuerto.
“It’s commendable to spend taxpayer money frugally and ensure it’s used where it’s most needed, rather than squandering it on luxurious private jets or official travel expenses,” basado sa sarong post.
Si Sheinbaum, bako suboot partikular sa mga international travel, alagad nagpoon na i-promotir an “austerity policy” sa irarom kan administrasyon kan saiyang ‘predecessor’ na si Andres Manuel Lopez Obrador, na nagpabakal sa Mexican presidential plane kan taong 2023.










