Uminabot na sa 4.07 milyones na metrikong tonelada an pig-angkat na bagas kan Pilipinas, mas halangkaw nin 20.06 porsyento kumpara sa 3.39 milyones na metrikong tonelada kan nakaaging taon, segun sa datos kan Bureau of Plant Industry.
An Vietnam ang pangenot na pigkukuwaan nin inangkat na bagas, na nagsuplay nin 2.73 milyones na metrikong tonelada.
Pigsusunudan ini kan Thailand asin Myanmar, mantang an iba pang suplay nag-abot hale sa nagkapirang nasyon sa Asya asin Europa.
Target na mag-abot sa lima na milyones na metrikong tonelada an kabilogan kan pig-angkat na bagas ngunyan na taon, tanganing mapakusog an reserba kan nacion sa pag-atubang sa posibleng epekto kan El Niño.
Sa tahaw kaini, padagos man na nagmamahal an presyo kan imported rice. Basado sa Daily Price Index kan Department of Agriculture, nasa 60 pesos asin 74 sentimos na kada kilo an imported special rice, mantang lampas 55 pesos naman an premium rice.
