LEGAZPI CITY-Nabalot nin mahibog na aso hale sa rinibong wildfire sa Canada an mahiwas na parte kan Estados Unidos kan Huwebes.
Huli digdi nagpatanid an mga otoridad sa publiko na magtenir sa kanya-kanyang harong.
Napag-araman na nairehistro sa Detroit an pinakamalalang air quality sa bilog na kinaban kan Huwebes, na igwang Air Quality Index (AQI) na 600—doble ini sa lebel na pigkokonsiderang “hazardous” kan U.S. Environmental Protection Agency (EPA).
Basado sa datos kan Amerika, uminabot na sa peligrosong lebel an mga aso sa mga estado kan Minnesota, Michigan, Illinois, Ohio, asin magin sa Ontario sa Canada.
Nakapagrehistro man nin hazardous air quality an mga ciudad kan Minneapolis, Milwaukee, asin Toronto, mantang dai mababa sa 10 states an nakaeksperyensya nin “unhealthy” na kalidad kan paros.
Piglalaoman na malala pa an kondisyon sa bilog na aldaw.
Sa New York, nairehistro man an orange na kalangitan asin kapansin-pansin man an masangsang na parong kan aso na dara kan paros sa lugar.
Pigeenganyar man kan mga local officials an mga residente sa mga nabanggit na nacion na limitahan an pagluwas sa saindang mga harong
Pinayuhan man an iba na igwang helang sa puso asin baga, mga bados, senior citizens, mga joven asin iba pang high-risk groups.
Mientras tanto nairehistro man kan gobierno kan Canado na igwang 858 active wildfire sa sainda kun sain 111 sa mga ini an presenteng dai makontrol.
Pinakamatinding naapektaran kaini an mga lalawigan kan Manitoba, Saskatchewan, asin Ontario.
