LEGAZPI CITY-Nakakua an Pilipinas nin mga US$2.5 bilyon na kantidad nin investment commitments gikan sa mga kompanya sa Canada sa lado kan pagmimina, enerhiya, IT asin business process management, asin digital economy.
Ipinag-orgulyo ni Presidente Ferdinand Marcos Jr. na dakulang tabang an nasabing investment ngani na lalo pang mapauswag an ekonomiya kan nacion.
Sa sidelines kan saiyang official visit sa Vancouver, Canada, nakipag-olay an Presidente sa nagkapirang darakulang kumpanya digdi na nagpahayag nin interes na mamuhunan sa nacion.
Sinabi man kan Malacañang na nagpapadagos an negosasyon para sa posibleng free trade agreement sa pagultanan kan Pilipinas asin Canada ngani na mas mapakusog pa an ekonomiya kan duwang nacion.
Napag-olayan man sa pagbisita kan Presidente an posibilidad na magkaigwa nin artificial intelligence hubs asin training centers sa nacion ngani mapakusog an skills kan AI workforce.
Tinawan man nin komendasyon kan Presidente an padagos na suporta kan Canada sa rules-based international order asin UNCLOS, orog na sa isyu kan South China Sea.
Enot kaini, pig-anunsyo ni Presidente Marcos na pig-elevate na an relasyon kan Pilipinas-Canada sa strategic partnership kasunod kan saiyang opisyal na pagbisita.
Segun sa saiya, an mas hararom na kooperasyon kan duwang nacion sa seguridad, komersyo, enerhiya, teknolohiya asin iba pang sektor na pinagkasunduan kan Canadian Prime Minister Mark Carney asin mga opisyales asin mga negosyante.
