LEGAZPI CITY—Karsel an bagsak kan sarong babae na pigkonsiderar na high-value individual-listed drug personality sa sarong buy-bust operation sa banwaan kan Camalig, Albay.
Binisto an suspek na si alyas “Donna”, nasa legal na edad, asin residente kan nasabing lugar.
Naarestar ini makalihis na magpabakal nin duwang katamtamang dakula asin nakataling transparent plastic bags na may laog nin pigtutubudang shabu karibay kan P95,000 na buy-bust money.
Nag-abot sa labi 100 gramo asin pigkarkulong street value na P680,000 an nakuang droga gikan sa suspek.
Narekober man sa posesyon ni alyas “Donna” an pirang non-drug evidence na kompwesto nin sarong sadit na plastic bag, sarong paper bag, sarong 1,000 genuine peso bill kaiba an pirang pidaso na replica kaini, sarong unit nin motorsiklo, sarong pidaso nin lyabe kan motorsiklo, sarong unit nin cellphone asin apat na pidaso nin transaction receipts.
Kinundusir an operasyon kan Philippine Drug Enforcement Agency Regional Office 5 (lead unit), Camalig Municipal Police Station, Provincial Intelligence Unit Albay Police Provincial Office, asin Coast Guard Intelligence Unit Albay.
Nasa kustodiya na ini kan kapulisan asin mahahampang sa kasong pagbalgar sa Republic Act No. 9165 o an Comprehensive Dangerous Drugs Act of 2002.
