LEGAZPI CITY- Liwat na nagpahayag nin suporta an Albay Police Provincial Office bilang saro sa mga partner kan Bombo Radyo Legazpi sa nagdadangdang na Dugong Bombo 2026.
Isasagibo an sabay-sabay na blood letting activity sa manlain lain na parte kan nacion na igwang Bombo Radyo asin Star FM Stations sa Nobyembre 14.
Segun ki Albay Police Provincial Office Spokesperson PCpt. Kharren Formales sa intrevista kan Bombo Radyo Legazpi na saro an pagdonar nin dugo sa mga paagi ngani na mapagaserbi asin makapagtaong proteksyon sa mga namamanwaan.
Napag-araman na pigkakarkulong nasa poco mas o menos 60 na mga blood donors an makikipartisipar hali sa mga city asin municipal police stations sa bilog na provincia kan Albay.
Sinabi kan opisyal na dakulang ‘fulfillment’ sa saindang pagmati na makapagtao nin paglaom sa mga nangangaipo nin dugo.
Huli digdi, sinabi ni Formales na pigsi-sierto man kan saindang personnel na physically fit sinda antes an pagdodonar nin dugo.
Katakod kaini, nangapudan an opisyal sa gabos na siertuhon man na mabaskog sinda asin pakusugon an hawak antes an nakatalaan na aktibidad.
An Dugong Bombo an binansagan na pinakamadugong blood letting activity na sabay-sabay na pigigibo sa manlain lain na parte kan nacion.
