LEGAZPI CITY-Preparado na an Sorsogon Police Provincial Office (PPO) sa posibleng epekto kan Super Typhoon Inday kaiba na sa makukusog na pag-uuran, pagbaha, asin pagrasay nin daga.
Segun kay Sorsogon PPO Public Information Officer Police Major Arwin Destacamento, sa intrevista kan Bombo Radyo Legazpi na nagkaigwa na sinda nin accounting o pagbusisi kan mga personahes asin mga equipment para sa mobility na posibleng magamit sa pag-respunde.
Ini mantang dai man direktang maapektaran an provincia kan bagyo, alagad mantenidong handa sinda bilang inisyatiba kan provincia enkaso igwang papaabot na raot nin panahon.
Nakikipag-koordinar na man sinda sa mga local disaster risk reduction and management offices para sa mga dapat gibuhon asin sa mga munisipalidad para sa mga kakulangan sa kagamitan.
Pigduman man ninda an mga flashflood asin landslide prone areas ngani abisuhan an mga residente na maghanda sa pag-abot kan bagyo.
Sa presente, nagtalaga na nin nasa 857 na mga personahes, kaiba an mga techinical support enkaso magkaigwa nin mga pag-respunde.
