LEGAZPI CITY-Ipighayag ni National Food Authority (NFA) Administrator Larry Lacson na igwang matinding pagbaba sa produksyon kan paroy ngonian na kasagsagan kan wet harvest season.
Segun sa opisyal, kaiba sa mga pangenot na salik na nagbusol sa nagkapirang lokal na paraooma na dae muna magtano, huli sa halangkaw na presyo kan mga pataba, siring man an dakulang danyos kan habagat asin sunod-sunod na bagyo.
Sa presente, nagkakawat sa P16 hasta P17 an pigkakarkulong puhunan kan mga paraooma sa kada kilo, mantang naghahalat pa an ahensya sa opisyal na datos hale sa Philippine Statistics Authority (PSA) ngani maaraman an kabilugang porsyento kan ibinaba kan ani.
Bilang paghahanda sa paparaning dry season harvest kun sain laoman na mapoon an pagtatanom liwat kan mga paraooma sa Enero, pigpaparikas kan ahensya an konstruksyon kan mga dugang na dryer asin miller na laomang makukumpleto sa masunod na taon.
Kaiba man sa lakdang an pag-upa nin kadugangang 65 pribadong bodega, kaya laoman suboot na maabot sa 1 million metric tons an kabilugang mai-ipon na paroy asin bagas.
Afuera pa digdi, kabale man sa pigtutukdok asin bubuksang bodega kan NFA, mahihiling sa Dumangas asin ibang parte kan Iloilo; Region 5 sa Albay, Camarines Sur, asin Catanduanes; asin Region 4 sa Palawan asin Occidental Mindoro.
