LEGAZPI CIY-Nagpatanid an Department of Health (DOH) sa publiko madapit sa halangkaw na peligro nin pagkaraot kan kakanon asin kontaminasyon kan tubig huli sa malalang tag-init na dara kan Super El Niño.
Susog sa departamento, an halangkaw na temperatura na pinalala kan posibleng mga pagkaantala nin kuryente, nagpaparikas kan pagtalubo kan bakterya, na nagpaparikas na maraot an mga lutong kakanon asin hilaw na mga sangkap.
Huli digdi, mahigot na inaabisuhan kan ahensya an publiko na siertuhon na malinig an tubig piggagamit sa paghugas nin kamot, preskong produkto, karne, asin mga gamit sa kusina, nganing maibitaran an mga foodborne illnesses.
Manungod sa inumon na tubig, pigrerekomendar kan ahensya na pakuluan ini nin maray kun igwa nin anuman na pagduda sa kalinigan asin siertuhon na harayo ini sa mikrobyo asin kontaminasyon.
Pinapagirumdom man an publiko na dai pagbayaan an mga lutong kakanon na nakalantad sa init o nakalaag sa lamesa nin halawig; imbes, tahoban an kakanon nganing maibitaran an paglakop kan mga nakakadanyar na organismo.
Nangangapudan an ahensya sa gabos na magtenir na mapagbantay asin magsunod sa tamang hygiene asin food storage practices ngani maprotehiran an salud kan saindang pamilya laban sa mga posibleng paglakop kan helang ngonian na mainit na panahon.
