LEGAZPI CITY-Nagkabitak-bitak an parte kan Pier Site sa Sitio Balete, Barangay Alimsog sa banwaan kan Sto. Domingo, Albay makalihis an nairehistrong magnitude 5.3 na linog kansuudma, Hunyo 5, 2026, pasado alas-9:57 nin pagka-banggi.
Segun sa Philippine Institute of Volcanology and Seismology (PHIVOLCS), an linog, igwang rarom na nasa 9 kilometers asin natukoy an lokasyon kaini na humigit-kumulang 15 kilometro sa timog silangan kan Sto. Domingo, Albay.
Nairehistro an Intensity V sa Sto. Domingo asin sa ciudad kan Legazpi, mantang Intensity IV naman sa Tabaco City, Ligao City, Malilipot, Albay, asin sa nagkapirang banwaan sa Sorsogon, kabale an Cogon, Irosin asin Donsol.
Namatean man an Intensity III sa Naga City, Malinao, Albay, asin Sorsogon City, sa Prieto Diaz, asin Juban. Siring man sa Goa, Camarines Sur asin Bulan, Sorsogon kun sain nairehistro an Intensity II.
Sa instrumental intensities, nagluwas na Intensity VI an nairehistro sa Tabaco City, Albay; Intensity V sa Castilla, Sorsogon; Intensity IV sa Sorsogon City asin Iriga City, Camarines Sur; Intensity III sa Prieto Diaz, Sorsogon; Monreal, Masbate; Sagnay, Sipocot, Pili, asin Mercedes, Camarines Sur; asin Intensity II sa Pasacao asin Ragay, Camarines Sur; Milagros, Masbate; San Roque asin Gandara, Northern Samar.
Sa presente, nagpapadagos pa an assessment kan mga otoridad ngani matukoy an hewas kan danyos.
Wara man nin nairehistrong casualty o nairido sa insidente, alagad padagos na pigpa-pagirumduman an mga residente na magin alerto sa posibleng aftershocks asin epekto kan linog, orog na sa mga edipisyo asin imprastruktura.
